\
29 Mart 2024 - Cümə

“Arvadının ölümünü Ramizin boynuna qoymaq istəyirlər” - “Buta Palace”ın art-direktorunun anası

“Arvadının ölümünü Ramizin boynuna qoymaq istəyirlər” - “Buta Palace”ın art-direktorunun anası
1651baxış

Ötən ilin dekabrında “Buta Palace”ın art-direktoru Ramiz Taxvelinin arvadı Adelya Taxveli yaşadığı evin balkonundan düşərək ölüb. İlkin məlumatda onun intihar etdiyi haqda məlumat yayılsa da, sonradan qətl olduğu qənaətinə gəlindi və əri Ramiz Taxveli günahkar bilinərək həbs olundu. Məhkəmə prosesləri zamanı məlum oldu ki, R.Taxveli məhkəməyə əlil arabasında gətirilir və özünü qəribə aparır. R.Taxvelinin anası Gülarə Məmmədova redaksiyamıza müraciət edərək oğluna verilən ittihamlar və hadisə barədə danışmaq istədiyini bildirib. 

G.Məmmədovanın “Qafqazinfo”ya müsahibəsini təqdim edirik:

- Oğlunuz Ramiz Taxveli arvadını döyüb işgəncə verdikdən sonra 5-ci mərtəbədən ataraq onu xüsusi amansızlıqla öldürməkdə ittiham edilir. İttihamla bağlı razılaşmadığınız fikirlər nədir?

- Mənim ümumiyyətlə, etirazım budur ki, hələ heç nə sübut olunmayıb. Mən deyə bilmərəm ki, Ramiz onu öldürməyib. Mən deyirəm ki, Ramizin onu balkondan atmasına dair sübut yoxdur. Əgər o, bu işdə təqsirləndirilən şəxsdirsə, cinayət işi materiallarında bir dəlil olmalıdır ki, bu cinayəti Ramizin etdiyini sübut etsin. Bu cinayət işində ancaq şübhələr, ehtimallar var. Bu şübhələr də əsas vermir ki, onlar cinayət işi açıb, kimisə həbs etsinlər. 

- Bəs maşınından narkotik tapılması ilə bağlı nə deyə bilərsiz?

- Ramiz tutulandan bir gün sonra gəliblər, onların evində işləyən Rəna xanımdan açarı alıb maşına baxıblar. Orada Ramiz olmayıb. 

- Amma Ramiz özü də məhkəməyə etiraf etdi ki, narkotik çəkib.

- Buna etiraz edə bilmirəm, çünki bundan məlumatım yoxdur.

- Bəs onda, Adelya Taxvelinin ölümü ilə bağlı sizin təxmininiz nədir? Hadisə necə olub?

- Mən bilmirəm, elə onu bilmək istəyirəm ki, hadisə necə olub. Mən orada olmamışam. Amma deyə bilərəm ki, Ramiz heç vaxt qəddar olmayıb, arvadı ilə vəhşicəsinə davranmayıb, onu döyməyib, sürüməyib. Bu uydurmalar gəlinim Adelyanın qohumlarından gəlir.

- Məhkəmə prosesində Adelya Taxvelinin anası Samirə xanım deyirdi ki, Ramiz tez-tez özünü qəribə aparırdı. Qonaqlığa gəlirdi, 4 saat maşından düşmürdü. Onun həmin vaxt narkotikin təsiri altında olduğunu bildirmişdi. İstintaq da belə hadisələrin üzərindən bu qənaətə gəlib ki, Ramiz hadisə vaxtı marixuananın təsiri altında olduğu üçün arvadına qarşı belə davranıb.

- Mən həkiməm, oxumuşam, bilirəm ki, marixuananın təsiri altında adam vəhşiyə dönmür. Dediyiniz hadisə Adelyagilin bağında olub. Ramiz o vəziyyətdəydisə, niyə həkim çağırıb ona kömək etmirdilər? Sonra da Adelya ilə uşaqları da oturdublar maşına, Ramiz sürüb, evə gəliblər. Hansı normal bunu edər?

- İttihamda yazılır ki, Ramiz Adelyanı atmadan öncə yataq otağından qızı Aliyanı oyadıb və ona da işgəncə verib. Aliya hadisənin necə baş verməsi ilə bağlı sizə nəsə deyib?

- Aliya anadangəlmə əqli qüsurludur, danışa bilmir, qavrama problemi var, inkişafdan zəifdir. O şahid kimi ifadə verə bilməz, istintaq da onu dindirməyib. Digər uşağın isə 3 yaşı tamam olmayıb. Bu hadisənin şahidi yoxdur. Hadisədən sonra Ramiz çarpayıda oturub uşaqlara albomdan şəkilləri göstərib.

- Ramiz məhkəmədə hadisəni törətmədiyini də demirdi, o, sadəcə heç bir şey xatırlamadığını deyirdi. 

- Bəli. Bilirsiniz nəyə görə xatırlamır?

- İstintaqın qənaətinə görə, həmin vaxt narkotikin təsiri altında olduğu üçün xatırlamır.

- Xeyr. Ona görə ki, Ramiz tutulandan 5 gün sonra eşitdik ki, komadadır. Birinci onu Nəsimi rayon polisi tutmuşdu, sonra bizə dedilər ki, Kürdəxanıya aparılıb. Biz də hər gün gedirdik, ona vermək üçün ərzaqları alırdılar, deyirdilər vəziyyəti yaxşıdır. Amma bizi görüşdürmürdülər. Beş gün sonra bildik ki, Neyrocərrahiyyə xəstəxanasında komadadır.

- Ramiz Taxveli məhkəməyə əlil arabasında gətirilir və qeyri-adi hərəkətlər edir. Həbsdən əvvəl onda belə bir əlamətlər var idi?

- Əlbəttə yox, travmadan sonra olub. İstintaq deyir ki, Ramiz Adelyanı döyüb, sonra ayaqlarından tutaraq qaldırıb və balkondan atıb. Əlil arabasında olan, ayaqları işləməyən adam bunu necə edə bilərdi? Ramizi evdən sap-sağlam aparıblar. İstintaqda onun başından o qədər vurublar ki, beyninə qan sızıb, gematomalar yaranıb, ayaqları tutulub, görməsi zəifləyib, yaddaşı itib, amneziya yaranıb, komaya düşüb. Sonra ondan soruşublar ki, hadisə necə olub, o da deyib ki, yadımda deyil. Bu formada da istintaq aparıblar. Ekspert rəy verib ki, istintaq aparmaq olar.

- Bəs istintaq əvvəl normal gəzən adamın indi məhkəməyə əlil arabasında gətirilməsini necə izah edir?

- Deyirlər ki, təcridxanada kamerada hansısa dustaqla mübahisə edib, onlar onu itələyiblər. Sonra Ramiz özü öz başını divara vurub, sonra da iflic olub. Axı bu hadisə ilə bağlı da cinayət işi açılmalıdır. Onu da deyirlər ki, Ramiz heç nə xatırlamadığı üçün iş bağlanıb. Ramiz indi heç nə xatırlamadığı üçün hər şeyi onun boynuna qoymaq çox asandır. Hətta istəsələr, Fransız inqilabını da Ramizin üstünə yıxa bilərlər. 

- Sizcə, Ramizi niyə döyüblər?

- Ya bunu ediblər ki, danışa bilməsin ya da məcbur qalıb qol çəksin. Ramiz heç bir sənədə qol çəkməyib.

- Belə deyək, bir müstəntiq üçün hadisəni intihar kimi rəsmilədirib işi bağlamaq daha rahatdır. Bu iş də ilk dəfə intihar kimi yayılmışdı. Nəyə görə hansısa istintaqçı “Buta Palace”ın art-direktorunu döyüb, ittiham vermək üçün bu qədər işlər görüb özünü də əziyyətə salsın? Burada nə maraq ola bilər ki?

- İstintaq düzgün aparılmayıb, sənədlər üzə çıxmayıb, sübutlar gizlədilir. Ona görə də kiminsə marağı var. Sözsüz ki, kimsə yuxarıdan aşağıya qədər bu instansiyalara tapşırıq verir ki, bu işi belə aparın.

- Kimdir o?

- İşə aidiyyatı olan adamdır. Sifariş olduğuna əminəm. Kimin sifariş verdiyini də təxmin edirəm. Amma onun adını sizə deyə bilmirəm. Mən də bilmək istəyirəm ki, bu sifarişçinin məqsədi nədir. 

- Bəs işin sifariş olduğunu necə əsaslandıra bilərsiz?

- İstintaqın gedişatı ilə. Ramiz komadan çıxandan sonra müstəntiq vəkilimiz və mənim yanımda xəstəxanada ondan ifadə alır. İttihamı oxuyur, amma Ramiz özündə deyil. Bu da onu çağırıb oyadır, deyir “Ramiz, mənim sənə bayaq dediklərim yadındadır?”, deyir yox. Başlayır növbəti dəfə oxuyur, sonda onun əlini tutub məcbur edir ki, qol çəksin. Bunların hamısını bizim yanımızda edib. Ramizin heç bir sənəddə imzası yoxdur. Amma ilk tutulduğu gün dövlət tərəfindən ona təyin olunan Şahid adlı vəkil ittihama qol çəkib ki, Ramiz etiraf edib. Amma həmin sənəddə Ramizin imzası yoxdur, huşu özündə olmadığı üçün qol çəkə bilməyib. Ramiz travma alıb, yaddaşı itib. İki cür yaddaş itkisi var, keçmişdə olanları unutmaq, bir də yaxın zamanda olanları unutmaq. Ramiz yaxın zamanda olanları xatırlamır. Ondan soruşurlar kimsən, ad-soyadını deyir, onlar da yazırlar ki, dindirmək olar, əqli yerindədir.

- Siz Ramizi tutulandan sonra nə vaxt gördünüz?

- Bir həftə sonra Neyrocərrahiyədə gördük, amma danışa bilmirdi, kameradan baxdıq. İki ay sonra özü ilə ünsiyyət qura bildik. Bədəni göm-göy idi, izlər vardı. Bu barədə Neyrocərrahiyədə həkim də rəy verib, amma istintaq bu göyərmələrə heç bir açıqlama vermir. Özü də yaddaşını itirdiyi üçün heç nə xatırlamır, ona nə etdiklərini bilmir. MRT ediblər, başında iki gemotoma var. Ramiz əməliyyat olunmasa, kor olacaq.

- Bəs onda, Adelyanı Ramiz onu öldürməyibsə, sizcə, əslində hadisə necə olub?

- Birinci gün nə demişdilər? İntihar. Sonra hər şeyi dəyişib başqa cür etdilər. Hadisə vaxtı binanın həyətində olan şəxs ifadəsində deyib ki, Adelya yerə düşəndə qışqırıq səsi eşitməyib. Əgər kimisə döyüb, onunla əlbəyaxa olub balkondan aşağı atırlarsa, məntiqlə, həmin adam həyəcanla qışqırmalıdır. Bu bir saniyəlik iş deyil ki. Amma özünü atan adam qışqırmaz.

- Bəs Adelyanın özünü öldürməsi üçün əsas var idi? Ailə münasibətləri necə idi? Gəlininiz sizə bir söz demişdi?

- Mənim o ailə ilə neçə vaxtdır əlaqəm yoxdur. Məni uzaqlaşdırmışdılar. Zəng edirdim açmırdılar, evlərinə neçə dəfə getdim qapını açmadılar. Məni nəyə görə uzaqlaşdırdıqlarını bilmədim. İkinci uşaq olanda dedim böyüklük edim, hədiyyə alıb getdim, qapını açmadılar. Ramiz də heç vaxt mənə ailəsindən şikayət etmirdi, deyirdi Adelyanı çox sevirəm.

- İttihamda qeyd olunmuşdu ki, Ramiz Aliyanın xəstə doğulmasına görə tez-tez Adelyanı günahlandıraraq evdə mübahisələr yaradıb, uşağın müalicəsi ilə maraqlanmayıb, heç bir kömək etməyib. Bu barədə nə deyə bilərsiz?

- Ramiz uşaqlarla nəfəs alırdı. Həmişə onlardan danışanda gözləri dolurdu. Aliyanı daha çox istəyirdi. Onu İsrailə, İrana, Türkiyəyə, Rusiyaya aparıb müalicə etdirib. Hamısının da pulunu özü ödəyib.

- Aydındır.

- Mənə heç nə aydın deyil. Bilmirəm ki, Ramizi niyə tutublar, niyə döyüblər, niyə bu işgəncələri veriblər, niyə onu əlil arabasına məhkum ediblər, niyə işi onun boynuna qoymaq istəyirlər. Mən bunların cavabını bilmək istəyirəm.