\
28 Mart 2024 - Cümə axşamı

“Onlayn medianın məsələsini Milli Məclisdə yenidən qaldıracam”

“Onlayn medianın məsələsini Milli Məclisdə yenidən qaldıracam”
1418baxış

“Etiraf edək ki, hazırda ölkədə və dünyada ictimai fikir internet üzərindən yayımlanan informasiya vasitələri tərəfindən formalaşır. Azərbaycanda reklam bazarında müəyyən problemlər mövcuddur. Bunları nəzərə alaraq KİV-in İnkişafına Dövlət Dəstəyi Fondu yazılı medianı maliyyələşdirir. Təəssüf ki, ictimai fikri formalaşdıran onlayn media tam olaraq kənarda qalır”. 
Bunu Modern.az-a açıqlamasında Mətbuat Şurasının sədri, deputat Əflatun Amaşov bildirib.
Onlayn medianın maliyyələşmə məsələsinin aktual olduğunu diqqətə çatdıran parlamentari payız sessiyasında məsələni yenidən gündəmə gətirməyi düşündüyünü vurğulayıb.“Onlayn medianın maliyyələşməsi məsələsi aktualdır. Çalışacam ki, məsələ növbəti payız mövsümündən başlayaraq Milli Məclisdə gündəmə gətirilsin və öz həllini tapsın. Bu məsələnin həlli reallaşarsa, həm dövlətimiz, həm də biz uduşlu olacağıq. Çünki indiki şəraitdə biz iqtisadi cəhətdən çətinlik çəkən hər hansı onlayın internet üzərindən yayımlanan media vasitəsini tarixin axarına buraxa bilmərik”.Əflatun Amaşovun sözlərinə görə, onlayn mediaya dəstək məqsədilə dövlət büdcəsindən maliyyə ayrılmalıdır.“Elə etməliyik ki, onlayn mediamız xaricdən ölkəmizə qara yaxmağa çalışan qüvvələrin təsiri altına düşməsin. Hesab edirəm ki, dövlət tərəfindən maliyyələşmənin həyata keçirilməsi müsbət nəticələr verə bilər”.

Əflatun Amaşov onlayn medianın maliyyələşməsi məsələsini bir neçə dəfə parlamentdə müzakirəyə çıxarıb.

Mediapress.az