Dünya və Avropa çempionu Andrey Draçyovu qətlə yetirən azərbaycanlı barədə yei xəbər var

Rusiyanın Xabarovsk diyarının prokurorluğu pauerliftinq üzrə Dünya və Avropa çempionu Andrey Draçyovu qətlə yetirən azərbaycanlı Anar Allahverənov barəsində cinayət işi üzrə ittihamnaməni təsdiq edib. İstintaq başlayarkən Rusiya Federasiyasının Cinayət Məcəlləsinin 111-ci maddəsinin dördüncü bəndinə (“qəsdən sağlamlığa ağır zərbə vurmaqla qarşı tərəfin ölümünə səbəb olmaq") görə iş qaldırılıb. Lakin zərərçəkənin hüquqi varislərinin şikayətindən sonra prokurorluq bu maddəni “xuliqanlıq niyyəti ilə qətl”ə dəyişib. Bu isə ağırlaşdırıcı maddə sayılır. Belə ki, əvvəl 15 ilə qədər cəza nəzərdə tutulurdusa, hazırda A.Allahverənov 20 ilə qədər, ya da ömürlük həbsə məhkum edilə bilər.

Məsələ ilə bağlı açıqlamasında hüquqşünas Fərhad Mehdiyev bildirib ki, Rusiya və Azərbaycanın cinayət qanunvericiliyi bir-birinə çox oxşardır:

“Burada ilk növbədə cinayət işinin başlamasına toxunmaq lazımdır. Bu iki şəxs restoranda bir-biri ilə mübahisə etdikdən sonra çıxıb, çöldə dalaşırlar. Burada zərərçəkmiş şəxs ağırlıqqaldıran, Anar isə qaydasız döyüş üzrə fəaliyyət göstərən idmançıdır. Əlbəttə, onların arasındakı döyüş idman döyüşü deyil və ona görə də burada xuliqanlıq niyyətinin olması doğrudur. Əvvəlcə başladılan cinayət işi “sağlamlığa qəsdən ağır zərər vurma”, daha doğrusu, “xuliqanlıq niyyəti ilə ehtiyatsızlıqdan zərərçəkmiş şəxsin ölümünə səbəb olma” maddəsi ilə başladılmışdı. Ondan sonra istintaq orqanı maddəni “xuliqanlıq niyyəti ilə qətl” maddəsinə tövsif edib. hazırda təsdiqlənən maddə ilə Anar ömürlük həbs edilə də bilər. Birinci hala əsasən, Anar Allahverənova Rusiya qanunvericiliyi ilə ən çoxu 15 il azadlıqdan məhrumetmə cəzası ala bilərdi. Eyni hadisə bizdə olsaydı, AR CM 126.3-cü maddəsinə əsasən, 7 ildən 12 ilə qədər azadlıqdan məhrumetmə cəzası verilərdi".

Hüquqşünas qeyd edib ki, burada qəsdən adamöldürmə faktı yoxdur və Anarın vəkili bunu məhkəmədə irəli sürməlidir:

“Prokurorluğun maddəni dəyişmək və zərərçəkənin hüquqi varisinin vəsatətini təmin etmək səlahiyyəti var. Ancaq olaya hüquqi qiymət məhkəmə prosesində veriləcək. Vəkil göstərməlidir ki, öldürmə cəhdi qəsdli deyil, çünki həmin şəxsdə öldürücü silah olmayıb. Prokurorluq nəyə əsasən sübut edə bilər ki, bu adam qəsdən adam öldürmək istəyir? Bir insanın “qəsdən adam öldürmədə” ittiham olunması üçün hər hansı silahdan – soyuq, isti və yaxud dəyənək və s. - istifadə etməsi lazımdır. Unutmaq olmaz ki, Anar döyüşçüdür və qaydasız döyüş onun həyat tərzidir, yəni adi haldır. Ona görə də prokurorluğun irəli sürdüyü bu iddia əsassızdır. Bu, Anar Allahverənova qarşı ədalətsiz yanaşmadır”.

Məsələyə münasibət bildirən hüquqşünas Səməd Vəkilov da Anar Allahverənovun RF-nın Cinayət Məcəlləsinin 285-ci maddəsi ilə təqsirləndirilməsinin hüquqa zidd olduğunu bildirib. Onun sözlərinə görə, bu maddə qəsdən törədilən cinayət əməlini özündə ehtiva edir:

“Sözügedən hadisə heç bir halda qəsdən törədilən cinayət kimi tövsif edilə bilməz. Çünki təqsirləndirilən şəxsin məqsədi heç də həmin şəxsi öldürmək olmayıb. Qeyd etmək lazımdır ki, eyni halla Anar Allahverənov da qarşılaşa bilərdi. Yəni Draçyovun zərbəsi nəticəsində ölə bilərdi. Bu halda da Draçyovu Allahverənovu qəsdən öldürməkdə təqsirləndirmək olmazdı”.

S.Vəkilov qeyd edib ki, xüsusilə burada kənardan durub seyr edən və hadisəni videoya köçürən şəxslər də məsuliyyət daşıyırlar.

Rusiyanın Xabarovsk diyarının prokurorluğu pauerliftinq üzrə dünya və Avropa çempionu Andrey Draçyovu qətlə yetirən azərbaycanlı Anar Allahverənov barəsində cinayət işi üzrə ittihamnaməni təsdiq edib. İttiham “xuliqanlıq niyyəti ilə qətl” maddəsi üzrə təqdim edilib. Azərbaycanlını törətdiyi cinayətə görə ömürlük azadlıqdan məhrum edilmə cəzası gözləyir.

Xatırladaq ki, hadisə bu il avqustun 20-də Xabarovsk şəhərində kafelərin birinin baş verib. Anar Allahverənov rusiyalı dünya çempionu ilə restoranda aralarında yaranan münaqişə səbəbindən çölə çıxaraq, təkbətək döyüşüblər. Draçev təkbətək davada aldığı zərbələrdən həyatını itirib. (axar)

Mediapress.az