Gürcüstanda azərbaycanlıların kompakt yaşadıqları Kvemo Kartli bölgəsində təcili tibbi yardım briqadalarının işində problem yaranıb.

“Mediapress.az”ın yerli bürosu xəbər verir ki, bu barədə bölgə qubernatoru Şota Rexviaşvili bildirib.

O deyib ki, buna səbəb Bolnisidə beş tibb işçisində koronavirusun təsdiqlənməsidir: “Onların arasında təcili tibbi yardım həkimi, tibb bacısı və sürücü də var. Hazırda çox sayda həkim özünütəcriddədir”.

Qubernatorun sözlərinə görə, Bolnisinin Savaneti kəndində üç nəfərdə də COVID-19 infeksiyası aşkarlanıb: “İlkin yoluxma mənbəyi hələ məlum deyil. Onların təmasda olduğu 280 şəxs artıq müəyyən olunub”.