Milli Məclis Aparatında yeni təyinat
1979baxış
Milli Məclis Aparatının rəhbərinə yeni müavin təyin edilib.
Yeni müavin Yaşar Əməşovdur. Y. Əməşov 1976-ci ildə Cəlilabad rayonunda anadan olub.
1993–1997-ci illərdə Bakı Dövlət Universitetinin Riyaziyyat fakültəsində, 2004–2008-ci illərdə Beynəlxalq hüquq fakültəsində təhsil alıb. İngilis və rus dillərini bilir.
2000–2004-cü illərdə Milli Məclis Aparatının məsləhətçisi, 2004–2006-cı illərdə böyük məsləhətçisi, 2006–2007-ci illərdə baş məsləhətçisi, 2007–2008-ci illərdə sektor müdiri, 2008–2018-ci illərdə şöbə müdirinin müavini vəzifələrində işləyib.
2018–2019-cu illərdə Prezident Administrasiyasının İnnovativ inkişaf və elektron hökumət məsələləri şöbəsinin, daha sonra İqtisadi məsələlər və innovativ inkişaf siyasəti şöbəsinin baş məsləhətçisi olub.
2019–2020-ci illərdə Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin Milli Məclislə əlaqələr sektorunun müdiri vəzifəsində çalışıb.
Evlidir, 3 övladı var.
