Qara Dəniz Ticarət və İnkişaf Bankının (QDTİB) baş katibi Aristotelis Spiliotsin “Report”a müsahibəsi

- Qara Dəniz Ticarət və İnkişaf Bankı Azərbaycanla əməkdaşlığı necə dəyərləndirir?

- Azərbaycan bizim üzv dövlətlərimizdən biridir. Qara Dəniz Ticarət və İnkişaf Bankına üzv olan dövlətlərin hökumətləri ilə əməkdaşlıq edərək, bütün ölkələr üçün xüsusi və spesifik strategiya həyata keçirməyə, ölkənin prioritetlərini dəstəkləməyə çalışırıq. Hesab edirəm ki, əməkdaşlığımız ötən illər ərzində kifayət qədər uğurlu olub. Ümid edirəm ki, gələcəkdə Azərbaycanda maliyyələşmə həcmini daha da artıracağıq. Biz həmçinin Azərbaycan iqtisadiyyatının diversifikasiyasına dəstək göstərməyə çalışırıq. Bununla yanaşı, qeyri-neft sənayesi sahələrində, yəni, müxtəlif sektorlarda müvafiq inkişaf layihələrini tapmağa çalışırıq.

- Koronavirus "COVID-19" pandemiyası Azərbaycan iqtisadiyyatına necə təsir göstərib?

- Pandemiya bütün dünya ölkələri kimi Azərbaycan iqtisadiyyatına da təsir edib. Buna baxmayaraq, pandemiyadan sonra, hazırda dünyada neft və qazın qiymətlərində kəskin artım yaşanır. Bu, isə Azərbaycan üçün gözəl nəticədir.Lakin dünya bazarlarında neft və qazın qiyməti hər zaman belə olmayacaq. Bu vəziyyət hazırda yaşanır və mən hesab edirəm ki, bu, neft sənayesindən gələn əlavə gəlirləri necə ehtiyatda saxlamağın yaxşı nümunəsidir. Diversifikasiyaya nail olmaq üçün iqtisadiyyatın digər sahələrinə dəstək olmaq vacibdir. Neftin qiymətinin yenidən azaldığı vaxtlar gəldiyi zaman Azərbaycan iqtisadiyyatı daha müstəqil, daha güclü ola bilər. Bu istiqamətdə bizim dəstəyimiz ola bilər.

- Hazırda dünyada Rusiya-Ukrayna münaqişəsinə görə ərzaq tədarükündə sıxıntılar yaşanır. Qara Dəniz Ticarət və İnkişaf Bankı bu istiqamətdə Azərbaycana və digər Cənubi Qafqaz ölkələrinə dəstək göstərməyi nəzərdən keçirirmi?

- Azərbaycan, Gürcüstan, Ermənistan banka üzv olan ölkələrdir. Biz investisiya yatırmağa və müvafiq layihələr tapmağa çalışacağıq. Biz həmçinin bu ölkələr arasında sərhədlərarası layihələrin həyata keçirilməsinə kömək etməyə çalışacağıq. Hazırda Ukrayna və Rusiyada vəziyyət gərgindir. Biz bilmirik ki, vəziyyət nə zaman yaxşılaşmağa doğru gedəcək.

- Qara Dəniz Ticarət və İnkişaf Bankı Azərbaycanda gələcəkdə hansı layihələrə dəstək göstərəcək?

- QDTİB-ə üzv olan ölkələrə dəstəyi həmin ölkələrdəki vəziyyətdən aslıdır. Bəzən bir ölkədə daha çox layihələrin maliyyələşdirilməsinə ehtiyac olur, digər ölkələrdə isə daha az. Ümumiyyətlə, müxtəlif ölkələr arasında tarazlığı saxlamağa çalışırıq. Bankın və digər maliyyə institutlarının kifayət qədər maliyyəsi var. Əsas sual vəsaitlə bağlı deyil, əsas məsələ müvafiq dövlət və özəl sektorları əhatə edən layihələrin tapılması və hazırlanması, iqtisadiyyatı diversifikasiya etmək, insanların rifahını yaxşılaşdırılmasına dəstək göstərməkdir.

Azərcanda bizim xüsusi dəstək göstərdiyimiz bir sektorumuz yoxdur. Biz müxtəlif sektorlara investisiya yatıra bilərik. Bununla yanaşı, biz çalışırıq qeyri-neft sahəsində olan layihələrə dəstək göstərək. Çünki, hesab edirik ki, neft sektorunda kifayət qədər vəsait var və bu sahənin bizə ehtiyacı yoxdur. Hesab edirik ki, biz ölkənin diversifikasiya istiqamətində əsas prioritetlərinə dəstək göstərə bilərik. Bununla bağlı, elə iyunun 24-də Bakıda Azərbaycan-Qara Dəniz Ticarət və İnkişaf Bankı arasında biznes-forum keçirilib. Forumun əsas məqsədi Azərbaycan kimi zəngin mənbələrə malik ölkələrin iqtisadiyyatlarının diversifikasiyasını təşviq etmək idi.

Mediapress.az