“Elmlə bağlı savadlılıq səviyyəsini mümkün qədər artırmalıyıq. Bizim şagirdlərimiz elmi savadlılığa malik olmalıdır və bu səpkidə dəyişiklər baş verməlidir”.

APA xəbər verir ki, bunu elm və təhsil naziri Emin Əmrullayev “Beynəlxalq Kosmik Hava Təşəbbüsü: Günəş, Kosmik Hava və Geosfer” beynəlxalq tədbirində çıxışı zamanı deyib.

O deyib ki, yerli kurikulumlarla bağlı islahatlar aparılmalıdır:“Bu vasitə ilə araşdırma kampaniyasını icra etməliyik. Ənənəvi tədqiqat institutları, milli akademiya sistemində fəaliyyət göstərən təsisatların gənc universitetlərlə əlaqə qura bilməsi müzakirə edilir. Qara qızılın insan kapitalına çevrilməsi devizi ilə gənclər üçün fürsətlər yaradılıb. Belə ki, xaricdə təhsil proqramı ilə 3 mindən çox azərbaycanlı dünyanın aparıcı universitetlərində təhsil alıb və öz ölkəsinə töhfə verir. Şadam ki, mən də bu proqramın məzunuyam və Azərbaycana qayıdaraq öz ölkəmə töhvə verirəm".