“Xızı kifayət qədər mənzərəsi və təbiəti gözəl olan rayondur. Özü də Şimal zonasında Qusarla bərabər nəmişlik az olan rayonlar sırasına daxildir. Ona görə Xızı rayonunun təbiətinə uyğun olaraq burada iaşə obyektlərinin tikilməsinə böyük ehtiyac var.

Mən çox istərdim ki, Xızı rayonunda böyük bir sanatoriya kompleksi tikilsin, istifadəyə verilsin. Çünki bu bölgəyə gələn qonaqlar kifayət qədər çoxdur. Təəssüflər olsun ki, Xızıda bu gün heç bir normal müəssisə yoxdur”.

Bizim.media-ya açıqlamasında Milli Məclisin üzvü Vahid Əhmədov belə deyib:

“Son vaxtlar bilirsiniz ki, Azərbaycana maraq kifayət qədər artıb. Şimal bölgəsinə də maraq kifayət qədər böyükdür. Çox ciddi işlər görülüb, yollar çəkilib və çəkilməkdə davam edir. Ona görə də Xızı rayonunda sanatoriyaların tikilməsi çox müsbət nəticə verər”. 

Xızıdan seçilmiş millət vəkili, Milli Məclisin elm, təhsil, səhiyyə komitələrinin üzvü olan Müşfiq Məmmədli də sözügedən məsələdən danışıb. 

“Martın 17-də hökumətin Milli Məclisdə hesabatı olacaq. Baş nazir də  iştirak edəcək. Mən Xızıda kardioloji sanatoriya tikilməsi barədə yazılı təklifimi hesabatdan sonra Nazirlər Kabinetinə təqdim edəcəyəm. Həmin təklifin proqrama salınması hökumətin səlahiyyətindədir”, - deyə millət vəkili bildirib.