Bu gün ictimai fəal Bəxtiyar Hacıyevin ev dustaqlığına dair vəsatətinə Bakı Apellyasiya Məhkəməsində baxılıb və təmin edilməyib. 

“Qafqazinfo” xəbər verir ki, B. Hacıyev iclasdan sonra vəkili Aqil Layıc vasitəsilə hüquq müdafiəçisi Novella Cəfəroğluya mesaj göndərib. 

Belə ki, o, N. Cəfəroğlunu şayiə yaymaqda ittiham edib. Bu barədə vəkil sosial şəbəkə hesabında paylaşım edib: “İnsan haqlarını müdafiə eləyə bilmirsən, barı şayiə yayma. Orduya yardım kampaniyası insanlarımızın ciblərindən kəsərək verdiyi yardım hesabına maliyyələşib, Soros Fondu tərəfindən deyil. Ən həssas dönəmdə insanlarımızın həmrəylik nəticəsində ordunun yanında olmalarına kölgə salmaq sadəcə ədəbsizlikdir və sifarişli hərəkətdir...”

N.Cəfəroğlu ona yönələn ittihamlara həmin statusun şərh bölümündə cavab verib. Hüquq müdafiəçisi belə söz demədiyini, kiminsə onun adından istifadə etdiyini qeyd edib.

Məsələ ilə bağlı N. Cəfəroğlunun özü ilə də əlaqə saxladıq. O, iddialara belə cavab verdi: “Soros Fondunun pulunu Azərbaycanda çox adam alır. Məsələ onda deyil, mən heç vaxt deyə bilmərəm ki, Sorosun pulu ilə Azərbaycan əsgərlərinə köməklik edib, o absurddur. Soros ermənilərin tərəfindədir. Onun hesabatı var və orada yaza bilməzdi ki, mən Azərbaycan əsgərlərinə Sorosun pulu ilə köməklik eləyirəm. Kimsə onu yazıbsa, absurd yazıb. Yalan sözdür. Mən ayrı söz demişəm, onu bir də demək istəmirəm, amma orada Sorosun adı olmayıb”.

O, həmçinin B. Hacıyevi hüquq müdafiəçisi kimi müdafiə etdiyini əlavə edib: “O insandan xoşum gəlmir. Amma axıra qədər onu müdafiə edəcəyəm. O insana görə yox, Azərbaycana söz gəlməsin deyə. Onun məhkəməsi həqiqətən düzgün aparılmayıb. Bunu hər yerdə demişəm. Amma onu buraxmaq lazımdır. Bunun üçün hamımız bir yerdə müraciət də eləmişik. B. Hacıyevi bir dəfə şəxsən özüm həbsxanadan çıxarmışam, 30 nəfərdən xahiş eləmişəm”