\
23 Iyun 2024 - Bazar günü

Kanadada Azərbaycanın Müstəqillik Günü qeyd olunub - FOTOLAR

Kanadada Azərbaycanın Müstəqillik Günü qeyd olunub - FOTOLAR
1858baxış

NAC - Kanada Azərbaycanlıları Şəbəkəsinin təşkilatçılığı ilə Toronto şəhər meriyasının qarşısında Azərbaycan Respublikasının Müstəqillik Gününə həsr edilmiş mərasim keçirilib. Tədbirdə NAC-in İcraçı Direktoru Nigar Cəbiyeva və KAŞ İdarə Heyətinin üzvü Kəmalə Şiriyeva çıxış edərək Azərbaycanın müstəqilliyinin 106-cı ildönümünün Kanadada yaşayan azərbaycanlı icması tərəfindən coşqu ilə qeyd edildiyi bildirilib. Və bu günün əhəmiyyətindən bəhs edilib. 

Daha sonra Kanada federal parlameninin deputatı, nazir xanım Yaara Saks və Konservatorlar partiyasından olan deputat və partiya liderinin müavini xanım Melissa Lantsman çıxış edərək Azərbaycan Demokratik Respublikasının şərqdə ilk respublika kimi yaratdığı dəyərlərin bu gün də yaşadığını qeyd edib. Kanadada yaşayan azərbaycanlıların bu dəyərlərə sahib çıxaraq ölkənin ictimai-siyasi həyatında aktiv rol oynadıqlarını bildirilib. Azərbaycan icmasının dostları olaraq, hər zaman əlamətdar günlərin qeyd edilməsində icma üzvlərinin yanında olmaqdan qürur duyduqlarının əlavə ediblər. 

Mərasimdə Türkiyə Respublikasının Torontodakı Baş Konsulu Can Yoldaş da çıxış edərək, qardaş Türkiyənin həmişə Azərbaycanın yanında olduğunu, ötən il Türkiyədə baş vermiş dəhşətli zəlzələdən sonra ilk yardımın məhz Azərbaycan Respublikası və həm ölkədə, həm də dünyada yaşayan Azərbaycan xalqı tərəfindən göstərildiyini bildirib. Sonda Baş Konsul Azərbaycanın müstəqilliyinin və rifahının Türkiyə və bütün türk xalqı üçün nə qədər vacib bir dəyər olduğunu Mustafa Kamal Atatürkün sözləri ilə ifadə edib: 

“Azərbaycanın kədəri kədərimiz,sevinci sevincimizdir”.

Tədbirin sonunda Kanada himni səsləndirilib. Daha sonra Azərbaycan himninin sədaları altında Azərbaycan Respublikasının dövlət bayrağı Toronto şəhər meriyasının qarşısında qaldırılıb. Tədbir Torontoda yerləşən Azərbaycan dili məktəbinin şagirdlərinin milli rəqslərin ifa edilməsi ilə başa çatıb. 

Könül Aypara

Mediapress.az